ဖုတ်ကောင်များ အကြောင်လေ.လာစရာ

Zombie (ဖုတ်ကောင်) အမျိုးအစားများ

          Zombie (ဖုတ်ကောင်)ဆိုသည် မိမိကိုယ်ကိုမည်သူမည်ဝါဖြစ်ကြောင်း၊ အခြေအနေ မည်ကဲ့သို့ ဖြစ်ပေါ် နေကြောင်း မသိရှိတော့ဘဲ ပတ်ဝန်းကျင်ရှိ အခြားသူများအား ဖျက်ဆီးခြင်း (တစ်ခါတစ်ရံ စားသောက်ခြင်း) ကိုသာ ပြုလုပ်သည့် အသေကောင်များကို ဆိုလိုသည်။ ကူးစက်နှုန်းမြင့်မားသော ဗိုင်းရပ်စ်ပိုးကြောင့် ဖြစ်ပေါ်လာသော ဖုတ်ကောင်များသည် အဆိုပါ ဗိုင်းရပ်စ်ပိုးအား ပတ်ဝန်းကျင်သို့ တောမီးပမာ အလျင်အမြန် ကူးစက်စေရန် အစဉ်အမြဲပြုလုပ်လေ့ရှိသည်။ သေပြီးနောက် ပြန်လည်ရှင်သန်လာမှသာ ဖုတ်ကောင် အစစ်အမှန် ဖြစ်ကြောင်း ဖုတ်ကောင်ကျွမ်းကျင်သူများက ဖော်ပြထားသည်။ ဖုတ်ကောင်အမျိုးအစားပေါင်း အများအပြားရှိသည့်အနက် လက်လှမ်းမီသလောက် ဖုတ်ကောင်အမျိုးအစား များကို ဆက်လက်ဖော်ပြ သွားပါမည်။

ရိုးရိုးသာမန် ဖုတ်ကောင်

          ရိုးရိုးသာမန်ဖုတ်ကောင်သည် သေဆုံးသွားပြီး ပြန်လည်ရှင်သန်လာသော ဖုတ်ကောင်ဖြစ်ပြီး ကောင်းမွန်စွာ လမ်းမလျှောက်နိုင်သောကြောင့် ခြေထောက်များကို ရှပ်တိုက်လျှောက်ကာ ပါးစပ်မှ ညည်းတွား လျက်ရှိမည် ဖြစ်သည်။ ပုံမှန်အနေအထားတွင် ယင်းဖုတ်ကောင်များသည် ကြမ်းတမ်း၍ ရန်လိုသော အမူအရာရှိသော်လည်း လျင်မြန်မှုမရှိပေ။ အဆိုပါဖုတ်ကောင်များသည် များသောအားဖြင့် ဗိုင်းရပ်စ်ပိုး ကူးစက်ခံရသောကြောင့် သေဆုံးပြီး ပြန်လည်ရှင်သန်လာသည့် ကိုယ်ခန္ဓာပျက်စီးနေသော ဖုတ်ကောင်များ ဖြစ်သည်။ ယင်းဖုတ်ကောင်များ၏ ကိုက်မိခြင်းကိုခံရပါ ဒဏ်ရမှတစ်ဆင့် ဗိုင်းရပ်စ်ပိုးကူးစက်မည်ဖြစ်သည်။ ထို့ပြင် ဗိုင်းရပ်စ်ပိုး၏ ကူးစက်ပုံအမျိုးအစားအလိုက် ခန္ဓာကိုယ်တွင်းရှိ အခြားသော အရည်များမှတစ်ဆင့်လည်း ကူးစက်နိုင်သည်။

Romero ဖုတ်ကောင်

          Romero ဖုတ်ကောင်ဆိုသည်မှာ ဒါရိုက်တာ George A. Romero ရိုက်ကူးခဲ့သော Night of the Living Dead ဇာတ်ကားနှင့် ယင်းဇာတ်ကား၏ အဆက်များဖြစ်သော Living Dead နာမည်ပါရှိသည့် ရုပ်ရှင်များတွင် ပါဝင်သည့် ဖုတ်ကောင်များကို ဆိုလိုသည်။ George A. Romero သည် ဖုတ်ကောင်အယူအဆများကို ခေတ်သစ်လူမှုအသိဥာဏ်နှင့် နှိုင်းယှဉ်၍ ပထမဦးဆုံး ဖော်ပြခဲ့သူဖြစ်သည်။ သူ၏ ဖုတ်ကောင်များသည် မူလ Voodoo မှော်ပညာဖုတ်ကောင်များနှင့် တူညီခြင်းမရှိဘဲ ကွဲပြားခြားနားသည်။ အထူးသဖြင့် ကွဲပြားချက်တစ်ခုမှာ ဖုတ်ကောင်ဖြစ်ပွားမှုပျံ့နှံခြင်း (outbreak) ၏ ရင်းမြစ်မတူညီခြင်းဖြစ်သည်။ Voodoo ဖုတ်ကောင်များသည် မှော်ပညာကြောင့် ဖြစ်ပေါ်လာခြင်းဖြစ်ပြီး Romero ၏ ဖုတ်ကောင်များသည် ဓာတ်ငွေ့နှင့် ဗိုင်းရပ်စ်ပိုးများကြောင့် ဖြစ်ပေါ်လာခြင်း ဖြစ်သည်။

သိပ္ပံနည်းပညာများကို အခြေခံသည့် ဖုတ်ကောင်

          လက်ရှိသိပ္ပံအတွေးအခေါ်များ၏ တစ်စိတ်တစ်ပိုင်းဖြင့် ရှင်းပြနိုင်သည့်နည်းလမ်းများကြောင့် ဖြစ်ပေါ်လာသော ဖုတ်ကောင်များကိုဆိုလိုသည်။ အများအားဖြင့် ဗိုင်းရပ်စ်ပိုးကြောင့် ကူးစက်ခြင်းဖြစ်သည်။ ယင်းဖုတ်ကောင်များသည် ဗီဒီယိုဂိမ်းများ (ဥပမာ - Resident Evil) ၊ ရုပ်ရှင်များနှင့် ၀တ္ထုများတွင် ပါဝင်သော ယေဘုယျဖုတ်ကောင် အမျိုးအစားဖြစ်သည်။

Max Brooks ဖုတ်ကောင်

          အဆိုပါဖုတ်ကောင်အမျိုးအစားသည် စာရေးဆရာ Max Brooks ရေးသားသော ၀တ္ထုများတွင် ပါဝင်သည့် ဖုတ်ကောင်အမျိုးအစားဖြစ်သည်။ Solanum ဗိုင်းရပ်စ်ပိုးကြောင့် ဖြစ်ပွားသော ဖုတ်ကောင် အမျိုးအစား ဖြစ်သည်။ Max Brooks ရေးသားသော World War Z စာအုပ်နှင့် The Zombie Survival Guide စာအုပ်များတွင် ပါဝင်သော ဖုတ်ကောင်အမျိုးအစားဖြစ်သည်။

လျင်မြန်သော ကူးစက်ဖုတ်ကောင်

          လျင်မြန်သော ဖုတ်ကောင်များသည် စစ်မှန်သော ဖုတ်ကောင်များမဟုတ်ဘဲ (သေပြီးနောက် ပြန်လည်ရှင်သန်လာခြင်းမဟုတ်ဘဲ) ရောဂါပိုးကူးစက်ခံရခြင်းကြောင့် ဖြစ်ပေါ်လာခြင်းဖြစ်သည်။ အခြားဖုတ်ကောင်များနှင့် နှိုင်းယှဉ်လျှင် ယင်းဖုတ်ကောင်များသည် ခွန်အားနှင့် အရှိန် ပိုမိုမြင့်မား၍ အချိန်ကြာမြင့်စွာ ပြေးလွှားနိုင်သည်။ သို့သော် ခံနိုင်ရည်အားတွင်မူ အခြားဖုတ်ကောင်များနှင့် နှိုင်းယှဉ်ပါက နည်းပါးသည်။ ရင်ဘတ်တွင် ဒဏ်ရာရလျှင်ဖြစ်စေ၊ သွေးထွက်လွန်၍ဖြစ်စေ၊ ဆာလောင်ငတ်မွတ်၍ ဖြစ်စေ၊ ကူးစက်ခံရသော ဗိုင်းရပ်စ်ပိုးကြောင့် ဖြစ်စေ သေဆုံးနိုင်သည်။ လျင်မြန်သော ဖုတ်ကောင်များကို 28 Days Later ၊ REC 2 အစရှိသည့် ရုပ်ရှင်များနှင့် Left 4 Dead ဗီဒီယိုဂိမ်းတို့တွင် တွေ့ရှိရသည်။

Roger Ma ဖုတ်ကောင်

          စာရေးဆရာ Roger Ma ရေးသားသော Zombie Combat Manual စာအုပ်တွင် ပါဝင်သော ဖုတ်ကောင်အမျိုးအစားဖြစ်သည်။ အဆိုပါဖုတ်ကောင်များ၏ မူလဇစ်မြစ်အား မသိရှိရသော်လည်း Max Brooks ရေးသားသော စာအုပ်များတွင် ပါရှိသည့် ဖုတ်ကောင်များနှင့် ဆင်တူသည်။ အဆိုပါဖုတ်ကောင်များသည် ပြင်းထန်ဆိုးဝါးသော အနံ့များထွက်ပေါ်ပြီး လျင်မြန်စွာ ပျက်စီးလွယ်သည်။ သို့သော် ပျက်စီးခြင်းသည် တစ်ပိုင်းတစ်စနှင့် ရပ်တန့်နိုင်သည်။ Solanum ဗိုင်းရပ်စ်ကူးစက်ခံရသော ဖုတ်ကောင်ကဲ့သို့ အလွန်အကျွံ မာကျောခြင်းမရှိပေ။ ယင်းဖုတ်ကောင်များအား ရိုက်နှက်ခြင်း၊ ခုတ်ပိုင်းခြင်း၊ သေနတ်နှင့် ပစ်ခြင်းကြောင့် ထွက်ပေါ် လာသော ကိုယ်တွင်းအရည်များမှတစ်ဆင့် ကူးစက်နိုင်သည်။ ကိုယ်တွင်းအရည်များမှတစ်ဆင့် ကူးစက်ခံရလျှင် အသွင်ပြောင်းခြင်း လျင်မြန်ပြီး စက္ကန့်အနည်းငယ် အတွင်းမှ နာရီအနည်းငယ်အတွင်း ဖုတ်ကောင်ဖြစ်နိုင်သည်။

Resident Evil ဖုတ်ကောင်

          အဆိုပါဖုတ်ကောင်များသည် Resident Evil ဇာတ်လမ်းတွဲများတွင် ပါဝင်သော T-Virus ကြောင့် ဖြစ်ပေါ်လာခြင်းဖြစ်သည်။ ယင်းဖုတ်ကောင်များသည် အခြားဖုတ်ကောင်အမျိုးအစားများနှင့် ကွာခြားပြီး လူများသာမက တိရစ္ဆာန်နှင့် အပင်များကိုပါကူးစက်နိုင်သည်။ T-Virus သည် အခြားဗိုင်းရပ်စ်ပိုးများ၏ ကူးစက်ပုံနှင့်မတူဘဲ အလွန်လျင်မြန်စွာ ပျံ့နှံ့ကူးစက်နိုင်သည်။ T-Virus ၏ မူကွဲတစ်မျိုးမှာ G-Virus ဖြစ်ပြီး ယင်းဗိုင်းရပ်စ်ပိုးကူးစက်ခံသူသည် မျိုးဗီဇသန္ဓေပြောင်းလဲမှုဖြစ်စဉ်များ ဖြစ်ပေါ်ပြီး အလွန်ကြမ်းတမ်းသော သတ္တ၀ါများ ဖြစ်ပေါ်နိုင်သည်။

နာဇီဖုတ်ကောင်

          နာဇီဖုတ်ကောင်ဆိုသည်မှာ ရေဒီယိုသတ္တိကြွမှုအလွန်ပြင်းထန်သော Ununpentium ဒြပ်စင်နှင့် ထိတွေ့ခဲ့သော နာဇီစစ်သားများမှတစ်ဆင့် ဖြစ်ပေါ်လာသော ဖုတ်ကောင်များ ကိုဆိုလိုသည်။ အဆိုပါ ဒြပ်စင်နှင့် ထိတွေ့ခဲ့သော ဂျပန်၊ ဆိုဗီယက်ရုရှား၊ အမေရိကန်နှင့် ဗီယက်နမ် စစ်သား/ပြည်သူများ သည်လည်း ဖုတ်ကောင်များ အဖြစ်သို့ အသွင်ပြောင်းခဲ့သည်။ အဆိုပါ ဖုတ်ကောင်များကို Call of Duty: World at War နှင့် Call of Duty: Black Ops ဗီဒီယိုဂိမ်းများတွင် တွေ့ရှိရသည်။ Ununpentium ဒြပ်စင်သည် ခွေးများကိုပါ ကူးစက်နိုင်ပြီး ကူးစက်ခံရသော ဖုတ်ကောင်များသည် ပုံမှန်ထက် ပိုမိုသန်မာလာကြောင့် တွေ့ရှိရသည်။

Cybernetic ဖုတ်ကောင်

          အလောင်းကောင်များ၏ဦးနှောက်များကို အီလက်ထရွန်နစ်ပစ္စည်းများနှင့် ချိတ်ဆက်ပြီး ဆက်သွယ် ထိန်းချုပ်မှု သိပ္ပံပညာသဘောတရားအရ ပြန်လည်အသက်သွင်းထိန်းချုပ်ထားသော ဖုတ်ကောင်များကို Cybernetic ဖုတ်ကောင်များဟု ခေါ်ဆိုသည်။ အဆိုပါ ဖုတ်ကောင်များကို Cyborg (လူစက်ရုပ်) နှင့် မရောထွေးသင့်ပေ။ Cyborg ဆိုသည်မှာ စက်ပစ္စည်းကိရိယာများကို တပ်ဆင် ထားပြီး အသက်ရှင်သန်နေသော လူသားကို ဆိုလိုသည်။

သဘာဝလွန် ဖုတ်ကောင်

          သဘာဝလွန်ဖုတ်ကောင်ဆိုသည်မှာ သိပ္ပံပညာရပ်များဖြင့် ရှင်းမပြနိုင်သော တစ်နည်းအားဖြင့် သဘာဝလွန်နည်းလမ်းများဖြင့် ပြန်လည်အသက်သွင်းထားသော ဖုတ်ကောင်များကို ဆိုလိုသည်။

Voodoo ဖုတ်ကောင်

          မှော်ဆရာ (သို့မဟုတ်) နတ်ဆရာများက အဆိပ်များနှင့် ပရဆေးပင်များကိုအသုံးပြု၍ လူသေကောင်အား ပြန်လည်အသက်သွင်းထားသော ဖုတ်ကောင်ကို Voodoo ဖုတ်ကောင်ဟု ခေါ်ဆို နိုင်သည်။ ယင်းဖုတ်ကောင်များသည် သမိုင်းတွင် အထောက်အထားရှိခဲ့သော ဖုတ်ကောင်များ ဖြစ်သည်။

Star Wars ဖုတ်ကောင်

          Star Wars ဇာတ်လမ်းများတွင် အနည်းငယ်သာပါရှိပြီး အလောင်းကောင်များကို Sith မှော်ပညာဖြင့် ပြန်လည်အသက်သွင်းထားခြင်းဖြစ်သည်။ ထို့ပြင် Blackwing ဓာတုပစ္စည်းများ ဖြင့်လည်း ပြန်လည်အသက်သွင်းနိုင်ကြောင်း Death troopers စာအုပ်တွင် တွေ့ရှိရသည်။ ယင်းဖုတ်ကောင်များသည် အနက်ရောင် အရည်များ ယိုစိမ့်လျက်ရှိပြီး လေဆာရောင်ခြည်သေနတ်ကို အသုံးပြုနိုင်ကာ အုပ်စုဖွဲ့ လှုပ်ရှားနိုင်ကြသည်။

အသိဥာဏ်ရှိသော ဖုတ်ကောင်

          အသိဥာဏ်ရှိသော ဖုတ်ကောင်ဆိုသည်မှာ ၄င်းတို့၏ ပင်ကိုယ်စရိုက်နှင့် အသိဥာဏ်ကို ထိန်းသိမ်းထားနိုင်သော ဖုတ်ကောင်များကိုဆိုလိုသည်။ အဆိုပါဖုတ်ကောင်အမျိုးအစားများကို Marvel Zombies ၊ Undead or Alive ၊ The House of Night Zombies ၊ Land of the Dead အစရှိသည့် ဇာတ်လမ်းများတွင် တွေ့ရှိရသည်။ အဆိုပါဖုတ်ကောင်များသည် ဇာတ်လမ်းများတွင် ပါဝင်မှုရှားပါးသည်။ Resident Evil ဇာတ်လမ်းတွင် သိပ္ပံပညာရှင်များ စမ်းသပ်ထားချက်အရ ဖုတ်ကောင်များသည် ပစ္စည်းများအား သာမန် လူသားများကဲ့သို့ ကိုင်တွယ်အသုံးပြုနိုင်ရန် မှတ်မိသေး ကြောင်းတွေ့ရှိရသည်။ သို့သော် ဒေါသထွက်လာပါက မူလရန်လိုစိတ်ပြန်လည် ပေါ်ပေါက် လာကြောင်းလည်း တွေ့ရှိရသည်။

          ဖုတ်ကောင်များတွင် အသိဥာဏ်ရှိသည်ဟု သက်သေသာဓကများ ပြသနိုင်လျှင်သော်မှ မယုံကြည် သင့်ပေ။ အဘယ်ကြောင့်ဆိုသော် ဖုတ်ကောင်များသည် အစဉ်အမြဲရန်လိုလျက်ရှိပြီး ဘေးပတ်ဝန်းကျင်အနီး တစ်ဝိုက်ရှိလူအများအား ဖျက်ဆီးသတ်ဖြတ်လိုစိတ် အပြည့်ရှိသောကြောင့် ဖြစ်သည်။